އިނގިރޭސި ޕްރިމިއާ ލީގުގައި އެންފީލްޑްގައި ކުޅުނު މެޗުން ލިވަޕޫލްގެ މައްޗަށް 1-0 އިން ކުރިހޯދައި، މެންޗެސްޓާ ސިޓީ ފަހަތަށް ޖައްސާލުމަށްފަހު އާސެނަލުން ތާވަލުގެ އެއްވަނައަށް ޖެހިލައި ތިން ޕޮއިންޓުގެ ލީޑެއް ނަގައިފިއެވެ. މިއީ 2012 ވަނަ އަހަރަށްފަހު އެންފީލްޑްގައި ލީގު މެޗަކުން އާސެނަލް މޮޅުވި ފުރަތަމަ ފަހަރެވެ. އަދި މިއީ ޕްރިމިއާ ލީގުގެ ތާރީޚުގައި އެ ޓީމުން ރަށުން ބޭރުގައި ހޯދި 300 ވަނަ މޮޅުވެސް މެއެވެ.
މެޗުގެ ހަމައެކަނި ލަނޑު ފެނިގެންދިޔައީ 16 ވަނަ މިނެޓުގައެވެ. މި ލަނޑަކީ ލިވަޕޫލްގެ ކީޕަރު އެލިސަން ހެދި ގޯހެއްގެ ފައިދާނަގައި، އާސެނަލްގެ ކުޅުންތެރިން ބޯޅަ ހޯދުމަށްފަހު ޑެކްލަން ރައިސް ހުރަސްކޮށްލި ބޯޅައަކުން ކައި ހަވާޓްޒް ކާމިޔާބުކުރި ލަނޑެކެވެ. މި ލަނޑަށްފަހު އާސެނަލުން ދެއްކީ ވަރުގަދަ ޑިފެންސިވް ކުޅުމެކެވެ.
ފުރަތަމަ ހާފުގައި ނުރައްކާތެރި ހަމަލާތަކަކާއެކު ލިވަޕޫލުން ބާރުބޮޑުކުރިއެވެ. ފްލޯރިއަން ވާޓްޒް ފޮނުވާލި ހިލޭޖެހުން ހުރަސްދަނޑިއަށް އަމާޒުވިއިރު، އެލެކްސިސް މެކް އަލިސްޓާ އަދި އަލެކްޒެންޑާ އިސާކް ފޮނުވާލި ހަމަލާތައްވެސް ގޯލާ އަމާޒުވާގޮތެއް ނުވިއެވެ. ދެވަނަ ހާފުގައިވެސް ލިވަޕޫލުން މަސައްކަތްކުރި ނަމަވެސް، 2002/03 ވަނަ އަހަރުގެ ސީޒަނަށްފަހު ފުރަތަމަ ފަހަރަށް އެންފީލްޑްގައި ކުޅުނު މެޗެއްގައި ގޯލާ އަމާޒުކޮށް އެންމެ ހަމަލާއެއްވެސް އެ ޓީމަށް ފޮނުވާލެވިފައެއް ނުވެއެވެ.
މި ނަތީޖާއާއެކު އާސެނަލުން 3 ޕޮއިންޓުގެ ލީޑަކާއެކު ތާވަލުގެ އެއްވަނަ ދަމަހައްޓާފައިވާއިރު، ލިވަޕޫލް އޮތީ އެއްވަނައަށްވުރެ 9 ޕޮއިންޓް ފަހަތުން ތާވަލުގެ 5 ވަނައިގައެވެ.
