ސްޕެއިން އަތުން ބަލިވެ ޕޯޗުގަލް ވޯލްޑް ކަޕުން ކެޓުމާ ގުޅިގެން، އެ ގައުމުގެ ކެޕްޓަން ކްރިސްޓިއާނޯ ރޮނާލްޑޯ ވަނީ 2016 ވަނަ އަހަރު ޕޯޗުގަލްއިން ހޯދި ޔޫރޯ މުބާރާތުގެ ތަށި އެއީ ވޯލްޑް ކަޕެއް ހޯދުން ފަދަ ބޮޑު ކާމިޔާބީއެއްގެ ގޮތުގައި ސިފަކޮށްފައެވެ.
ވޯލްޑް ކަޕްގެ ތަށި ހޯދުމުގެ ހުވަފެން ނިމުމަކަށް އައުމުން ލިބުނު މާޔޫސްކަމުގެ ތެރޭގައި ވާހަކަދައްކަމުން ރޮނާލްޑޯ ބުނީ، ޕޯޗުގަލް ކަހަލަ ގައުމަކަށް ޔޫރަޕްގެ އެންމެ ބޮޑު މުބާރާތް ކާމިޔާބުކުރެވުމަކީ ވޯލްޑް ކަޕް ކާމިޔާބުކުރުމާ އެއްވަރުގެ ކަމެއް ކަމަށެވެ. ޕޯޗުގަލްގެ ފުޓްބޯޅަ ތާރީޚުގައި އެ ގައުމަށް ބައިނަލްއަގުވާމީ ފުރަތަމަ ބޮޑު ތަށި ހޯދައިދިނުމަކީ އޭނާގެ ކެރިއަރުގައި ލިބުނު އެންމެ ބޮޑު އުފާ ކަމަށް އޭނާ ފާހަގަކުރިއެވެ.
"ޕޯޗުގަލްއަށް ޔޫރޯ މުބާރާތް ކާމިޔާބުކޮށްދިނުމަކީ ވޯލްޑް ކަޕް ތަށި ހޯދުން ފަދަ ކަމެއް. އަހަރެން ޕޯޗުގަލްއާއެކު ދެ ތަށި (ޔޫރޯ އަދި ނޭޝަންސް ލީގު) ކާމިޔާބުކުރިން. އެއީ އަހަރެން އަބަދުވެސް ފަޚުރުވެރިވާނެ ކަމެއް." ރޮނާލްޑޯ ބުނެއެވެ.
ރޮނާލްޑޯގެ ކެރިއަރުގައި ވޯލްޑް ކަޕް ތަށި ނުލިބުނު ނަމަވެސް، އޭނާއަކީ ފުޓްބޯޅަ ތާރީޚު ދުށް އެންމެ މޮޅު އެއް ކުޅުންތެރިޔާކަމާ މެދު އެއްވެސް ބަޔަކު ދެބަހެއް ނުވެއެވެ. ބައެއް މުހައްލިލުން ބުނާ ގޮތުގައި ރޮނާލްޑޯގެ މި ބަސްތަކަކީ ވޯލްޑް ކަޕް ތަށި ނުލިބުމުން ލިބުނު ހިތްދަތިކަން ކުޑަކުރުމަށް ބުނި ބަސްތަކެކެވެ. ނަމަވެސް ޕޯޗުގަލްގެ ސަޕޯޓަރުން ގަބޫލުކުރާ ގޮތުގައި ރޮނާލްޑޯ ގައުމަށް ކޮށްދިން ޚިދުމަތްތަކަކީ އެއްވެސް ތައްޓަކަށްވުރެ އަގުބޮޑު ޚިދުމަތްތަކެކެވެ.
