ޑްރަގް ކެފޭއެއްގެ ގޮތުގައި ބޭނުންކުރި، މާލޭގެ އެޕާޓްމެންޓަކުން ހައްޔަރުކުރި ހަ މީހެއްގެ ބަންދަށް ކްރިމިނަލް ކޯޓުން މިއަދު 30 ދުވަސް ޖަހައިފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ، 24 އަހަރާއި 39 އަހަރާއި 23 އަހަރާއި 21 އަހަރާއި 45 އަހަރުގެ ފިރިހެނުންގެ އިތުރުން 41 އަހަރުގެ ފިރިހެނެކެވެ.
ފުލުހުން މަޢުލޫމާތު ދިން ގޮތުގައި، އެ މީހުން ހައްޔަރުކޮށްފައި ވަނީ މަސްތުވާތަކެތި ގެންގުޅުމާއި، ބޭނުންކުރުމާއި، ވިޔަފާރިކުރުމާއި، ޓްރެފިކް ކުރުމުގެ ތުހުމަތުގައެވެ.
ބަންދު އަމުރުގައި ބުނީ، އެ މީހުން ތިބި އެޕާޓްމެންޓުން ގިނަ އަދަދެއްގެ މަސްތުވާތަކެއްޗާއި ފައިސާގެ އިތުރުން، މަސްތުވާތަކެތި ކިރުމަށް ބޭނުންކުރާ ކައްޓާއެއް ފެނިފައިވާ ކަމަށެވެ.
އަދި އެ ތަނަކީ ކެފޭ އުސޫލުން މަސްތުވާތަކެތި ވިއްކައި، އެ ތަކެތި ބޭނުންކުރުމުގެ އިންތިޒާމު ހަމަޖައްސާފައިވާ ތަނެއް ކަމަށާއި، އެ ތަނުން ފެނުނު މަސްތުވާތަކެއްޗާއެކު ފައިސާވެސް ރަބަރު ޕެކެޓުތަކަށް ލާފައި ހުރި ކަމަށް އެ އަމުރުގައި ވެއެވެ.
މީގެ އިތުރުން، ހައްޔަރުކުރި ބައެއް މީހުން އެ ތަނަށް ގިނައިން ވަދެ ނުކުމެ ހަދާތަން ފެނިފައިވާ ކަމުގެ ހެކިބަސް ލިބިފައިވާ ކަމަށް ފުލުހުން ކޯޓުގައި ބުނެފައިވެއެވެ.
ނަމަވެސް، ތުހުމަތުކުރެވޭ މީހުން ކޯޓުގައި ބުނެފައިވަނީ، އެޕާޓްމެންޓުން ފެނުނު މަސްތުވާތަކެއްޗާ އެއްވެސް ގުޅުމެއް ނެތް ކަމަށާއި، ތުހުމަތުތަކަށް އިންކާރުކުރާ ކަމަށެވެ. އެހެންނަމަވެސް، ފުލުހުން ހުށަހެޅި ހެކިތަކަށް ރިޢާޔަތްކޮށް، ކޯޓުން ވަނީ އެ އެންމެން 30 ދުވަހުގެ މުއްދަތަށް ބަންދުގައި ބައިތިއްބަން އަމުރުކޮށްފައެވެ.
