ރާއްޖެއިން ހިމަބިހި (މީސްލްސް) އަށް ޕޮޒިޓިވްވި މީހުންގެ ޖުމްލަ އަދަދު 15 އަށް އަރައިފި ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ރާއްޖެއިން އަލުން މި ބަލީގެ ކޭސްތަކެއް ފެންނަން ފެށުމާ ގުޅިގެން، ބަލި ފެތުރުން ކޮންޓްރޯލް ކުރުމަށްޓަކައި އެޗް.ޕީ.އޭ އިން އަންނަނީ ވަރުގަދަ ފިޔަވަޅުތަކެއް އަޅަމުންނެވެ.
އެޗްޕީއޭގެ ތަފާސްހިސާބުތަކުން ދައްކާގޮތުގައި، މިދިޔަ މެއި މަހުގެ 13 ވަނަ ދުވަހު ފުރަތަމަ ކޭސް ފެނުނު ފަހުން މިހާތަނަށް 15 މީހަކު ވަނީ މި ބައްޔަށް ޕޮޒިޓިވްވެފައެވެ. މީގެ ތެރެއިން 4 ކޭސްއަކީ ނިމިދިޔަ ހަފުތާގެ ތެރޭގައި އަލަށް ފެނުނު ކޭސްތަކެވެ. ފާހަގަކޮށްލެވޭ ގޮތުގައި، މިހާތަނަށް ފެނިފައިވާ ހުރިހާ ކޭސްތަކެއް ވެސް ރިޕޯޓުކޮށްފައިވަނީ މާލެ ސަރަހައްދުންނެވެ.
ރާއްޖެއަކީ ހިމަބިހި އެއްކޮށް ނައްތާލެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމްއިއްޔާއިން ކަނޑައަޅާފައިވާ ގައުމަކަށް ވުމާއެކު، މި ބަލި އަލުން ފެނުމަކީ ކަމާބެހޭ ފަރާތްތަކުން ނުހަނު ކަންބޮޑުވާ ކަމެކެވެ. އެހެންކަމުން، ބަލި ޖެހިފައިވާ މީހުންނާ ދިމާވި މީހުން ދެނެގަތުމުގެ މަސައްކަތް (ކޮންޓެކްޓް ޓްރޭސިންގ) އެޗްޕީއޭ އިން އަންނަނީ ވަރަށް ގާތުން ކުރަމުންނެވެ.
އެޗް.ޕީ.އޭ އިން ވަނީ ބަލި ފެތުރުން ހުއްޓުވުމަށްޓަކައި އާންމުންގެ އެއްބާރުލުން ނުހަނު ބޭނުންވާކަން ފާހަގަކުރައްވާފައެވެ. އެގޮތުން:
- ބަލި ޖެހިފައިވާ މީހަކާ ދިމާވެފައިވާ ފަރާތްތަކުން އެޗްޕީއޭ އަށް ސައްހަ މައުލޫމާތު ދިނުން.
- ދަތުރުފަތުރު ކުރި ގޮތުގެ ތަފްސީލާއި ބައްދަލުވި މީހުންގެ މައުލޫމާތު ހިއްސާކުރުން.
- ހިމަބިހީގެ ވެކްސިން ފުރިހަމަނުކުރާ ފަރާތްތަކުން ވީހާވެސް އަވަހަކަށް ވެކްސިން ފުރިހަމަކުރުން.
ހިމަބިއްސަކީ ވަރަށް ހަލުވިކަމާއެކު ފެތުރޭ ބައްޔަކަށް ވާތީ، ބަލީގެ އެއްވެސް އަލާމާތެއް ފެނިއްޖެ ނަމަ ލަސްނުކޮށް ސިއްހީ އެހީތެރިކަން ހޯދުމަށާއި، ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުވުމަށް ސިއްހީ މާހިރުން އިރުޝާދު ދެއްވައެވެ.
