ކުރީގެ ސްޓޭޓް މިނިސްޓަރު އަކްރަމް ކަމާލުއްދީން މިގޮތަށް ނިންމެވީ، ދެ އިންތިހާބު އެއްކޮށް ބޭއްވުމާ މެދު ރައްޔިތުންގެ ފެންނަ ނުފެންނަ ވޯޓެއް ނެގުމަށް އަންނަ މަހުގެ 4 ވަނަ ދުވަހަށް ތާވަލުކޮށްފައި ވަނިކޮށެވެ. އަކްރަމް ނިސްބަތްވާ އެމްޑީޕީން މި ވޯޓާ ދެކޮޅަށް ކޯޓަށް މައްސަލަ ހުށަހަޅާފައިވީ ނަމަވެސް، އޭނާ ވިދާޅުވީ ދެ އިންތިހާބު އެއްކޮށް ބޭއްވުމުން ގައުމަށް ބޮޑެތި ފައިދާތަކެއް ކުރާނެ ކަމަށެވެ.
އަކްރަމް ފާހަގަކުރެއްވި މައިގަނޑު ސަބަބުތައް:
-
ނުފޫޒުން އެއްކިބާވުން: ވެރިކަމަށް ކުރިމަތިލާ ފަރާތުން މަޖިލިސް ހޯދުމަށް ކުރާ މަސައްކަތް ކުޑަވެ، ރައްޔިތުން ބޭނުންވާ މިނިވަން މަޖިލީހެއް ހޮވުމަށް މަގުފަހިވުން.
-
ޚަރަދު ކުޑަވުން: ދައުލަތުންނާއި ސިޔާސީ ޕާޓީތަކުން އިންތިހާބަށް ކުރާ ބޮޑު ހޭދަ އެތައް ގުނައަކުން ސަލާމަތްކުރެވުން.
-
ސަރުކާރުގެ ފޯކަސް: އަބަދު އިންތިހާބުތަކުގެ ފްރެޝަރުގައި އޮތުމުގެ ބަދަލުގައި، ސަރުކާރުގެ މައިގަނޑު އަމާޒުތަކަށް މަސައްކަތް ކުރެވޭނެ މާހުލެއް ގާއިމުވުން.
-
ވޯޓުލާ ނިސްބަތް: ދެ އިންތިހާބު އެއްކޮށް ބޭއްވުމުން ވޯޓުލާން ނިކުންނަ މީހުންގެ އަދަދު އިތުރުވުން.
އަކްރަމް މިހެން ވިދާޅުވި ނަމަވެސް، އެމްޑީޕީން ދަނީ މި ވޯޓަކީ ގާނޫނުއަސާސީއާ ހިލާފު ކަމެއް ކަމަށް ބުނެ ކޯޓުގައި ވަކާލާތު ކުރަމުންނެވެ. އެ ޕާޓީން ބުނާ ގޮތުގައި މި ވޯޓުގައި އަހާ ސުވާލު ފަރުމާކޮށްފައިވަނީ ގާނޫނުއަސާސީގެ ރޫހާ އެއްގޮތަކަށް ނޫނެވެ.
ރާއްޖޭގެ ސިޔާސީ މަސްރަހު މިހާރު ހޫނުވެފައިވަނީ އިންތިހާބުތަކުގެ ނިޒާމަށް ގެންނަން އުޅޭ ބޮޑު ބަދަލާ ގުޅިގެން ސަރުކާރާއި އިދިކޮޅު ފަރާތްތަކުގެ މެދުގައި އުފެދިފައިވާ ހިޔާލުތަފާތުވުންތަކުގެ ސަބަބުންނެވެ.
